# गुरु हा संतकुळीचा राजा

- Latin: Guru Ha Santakulicha Raja
- Collection: अभंग (Abhang)
- Source: https://www.amrutvahini.in/abhang/guru-ha-santakulicha-raja
- Language: Marathi (मराठी), original text, untranslated
- Last revised: 2026-09-17
- Tags: अभंग

## अभंग

गुरु हा संतकुळीचा राजा ।  
गुरु हा प्राणविसांवा माझा ।  
गुरुवीण देव दुजा ।  
पाहातां नाहीं त्रिलोकीं ॥१॥  
गुरु हा सुखाचा सागर ।  
गुरु हा प्रेमाचा आगर ।  
गुरु हा धैर्याचा डोंगर ।  
कदाकाळी डळमळीना ॥२॥  
गुरु वैराग्याचें मूळ ।  
गुरु हा परब्रह्म केवळ ।  
गुरु सोडवी तात्त्काळ ।  
गांठ लिंगदेहाची ॥३॥  
गुरु हा साधकाशीं साह्य ।  
गुरु हा भक्तालागी माय ।  
गुरु हा कामधेनु गाय ।  
भक्ताघरीं दुभतसे ॥४॥  
गुरु घाली ज्ञानाजंन ।  
गुरु दाखवी निज धन ।  
गुरु सौभाग्य देउन ।  
साधुबोध नांदवी ॥५॥  
गुरु मुक्तीचें मंडन ।  
गुरु दुष्टाचें दंडन ।  
गुरु पापाचे खंडन ।  
नानापरी वारितसे ॥६॥  
काया काशी गुरु उपदेशी ।  
तारक मंत्र दिला आम्हाशीं ।  
बापरखुमादेवीवराशी ।  
ध्यान मानसी लागलें ॥७॥

---

Reproduced from the source pothi, unaltered. Free to read at https://www.amrutvahini.in.
Index of the full archive: https://www.amrutvahini.in/llms.txt